Partidu Balun ‘Lohi’ Povu Hodi Hetan Kartaun Eleitorál

Pesoál husi partidu foun balun tun ba bazé hodi rekolla kartaun militantes FRETILIN hodi dehan katak atu simu solar sél, maibé ikus mai sira hakfodak bainhira sira nia kartaun uza ba rejistu partidu.

Militantes Fretilin Fransico da Costa Marçal husi Suku Letefoho, Postu Administrativu Same, Municipiu Manufahi hatete ida ne’e, bainhira  Deputadu Bankada FRETILIN Fransisco Miranda Branco halo kontaktu eleitorál ho militantes sira iha loron (20/12/2015).

“Sira mai rekolla kartaun eleitorál dehan atu simu solar sél, maibé ikus mai ami rona ba rejistu fali partidu,” dehan Fransico da Costa Marçal.

Militante FRETILIN ne’e lamenta tanba hahalok  ne’e lohi povu iha baze ho sasan estadu nian.

Hatan ba preokupasaun ne’e, Deputadu Bankada FRETILIN Fransisco Miranda Branco hatete, FRETILIN fó benvindu ba partidu foun sira ne’ebé mosu.

FRETILIN nudar partidu libertador, Branco dehan, infrenta dezafiu desdé 1975 maibé konsenge duni realize mehi FRETILIN no Povu Maubere nian depois tinan  24 hodi hetan independensia, iha tenpu independensia FRETILIN kontinua hasoru dezafiu  hanesan krize 2016 maske nune’e  FRETILIN hamrik metin nafatin nudar forsa politíka iha Timor Leste hodi kontribui nafatin ba paz no establidade, konstruksaun estadu no dezenvolvimentu nasionál atu liberta povu husi kiak no mukit.

Branco dehan, FRETILIN la hakfodak ho partidu sedeit mak mosu tanba kontituisaun RDTL fó dalan, maibe lamenta kuandu lohi povu.

“Ita hanesan ema ita nia harga  diri (Dignidade) tenki iha, Fretilin la hakfodak ba partidu sesedeit mak mosu,” dehan Branco.

Iha iha sorumutu ne’e Militantes sira mos hato’o sira nia perokupasaun hanesan, problema  veteranu, problema fila rai gratuita husi Ministeriu Agrikultura, problema rekrutamentu funsionariu publiku.