TL Labele Sai Fatin Hodi Produz Diploma

Bankada FRETILIN liu husi Kamarada Fransisco Branco husu Ministeriu Edukasaun atu hare reformula politíka edukasaun iha rai laran hodi nune’e  produs rekrusu umanu ne’ebé kualidade no kria servisu ba nia an rasik inklui bele kompete iha merkadu de tranballu.  

“Too tenpu ona,  governu reformula de edukasaun iha ita nia pais atu nune’e ita nia rekrusu umanu sira ne’ebé sai husi ne’eba (universitariu), atu sira rasik bele buka servisu ba sira nia an, ou sira pronto atu ba kampo de traballu,” dehan Kamarada 

Branco iha debate espesialidade OJE 2016 iha loron (16/12/2015).

Kamarada Branco preokupa tanba durante ne’e  estudante barak mak remata sira nia kursu iha Universitariu maibe kualidade sei sai kestaun bo’ot.

 “Ita nia universidade sira tinan-tinan produs , ita nia nasaun ne’e hari industria bo’ot ida mak produs kanudu no fahe kanudu, ka fahe diploma,” dehan Branco.

Iha parte seluk, Kamarada Branco apresia politíka governu nian atu investe iha jardin invatil tanba prosesu aprendizajen iha nasaun barak, komesa husi jardin  infantil, iha ne’eba mak dezenvolvimentu rekrusu umanu hahu no  halo formasaun ba futuru ema ne’ebé atu kaer nasaun ne’e ba oin.

Hatan ba kestaun ne’e, Ministru Estadu Asuntu Sosial no Ministru Edukasaun Antonio de Conceição hatete, politíka reformulasaun edukasaun iha prosesu laran atu hare no deskute konaba dezenvolvimentu politíka nasional  ba edukasaun.

Dalan seluk mak, Ministru Estadu Antonio dehan, halo konversaun ba Eskola Secundariu Jerais ba Tekniku Vokasionál.

“Hanesan konversaun eskola Sencudariu Jerais ba Tekniku Vokasionais  ho intensaun ida, atu eskola vokasionais ne’e bele hanorin ona estudante sira abilidade tekniku hodi nune’e sira bele dezenpaña sira papel iha sosiedade,” dehan Antonio

Entertantu OJE  2016  ba Ministeriu Edukasaun hamutuk milloens $100,613 mill ne’ebé fahe kapital salariu vensimentu millaun $56,510 mill, bens servisu millaun $41,044, transferensia publika $2,709, kapital minor $350 mill.

Orsamentu Ministeriu Edukasaun pasa iha votasaun ho votus afavor 63, kontra zero no apstensaun zero.