Governu Tenki Halo Auditoria ba CNE

Parlamentu Nasionál, liu husi bankada Fretilin husu halo auditoria ba Comisaun Nasionál das Eleisoens (CNE) tanba laiha disiplina ba ejekusaun orsamentu jerál estadu 2015.

Xefe Bankada Fretilin, Kamarada Deputadu Aniceto Guterres hatete, ejekusaun orsamental jerál estadu 2015 iha CNE liliu iha kapital Bens Servisu balun ejekuta  to’o prosentu 1060.

 “Despeza ba operasional mak 1060%, komesa husi lokal travel 182%, viagen estrangeiru 380%,” dehan Kamarada Aniceto iha debate OJE 2016 loron (18/12/2015).

Aniceto preokupa, CNE foti osan husi ne’ebé? lei jestaun finanseiru fó dalan, maibé 1060% ne’ebé liu tiha ona 20%.

 “Hau hanoin Primeiru Ministru buat kestaun disiplina orsamentál, jestaun ne’e halo nusa,” dehan Aniceto.

Maske CNE nudar instituisaun independente, maibé  governu labele husik instituisaun ida-idak lao tuir nia hakarak, tanba  intermus jestaun finanseira laiha disiplina.

“Hau hanoin tenki hare didiak buat ruma iha ne’eba lao lalos, I persijamente halo auditoria ruma iha ne’eba,” dehan Aniceto

Deskonfia CNE uja fali osan ba eleisoens suku tinan 2015 ne’ebé  adia tiha ona.

“Tinan 2015 ne’e, nein eleisaun ida iha, se eleisaun ruma iha karik despeza operasional ne’e bele boot, dala ida tan jestaun ne’e ladiak, ami hare mall gastu ne’e barak iha ne’e,” dehan Aniceto.