Aviaun Timor Leste Sei Halo Operasaun ba Maliana, Suai no Atauro

Sekretariu Jeral Partidu FRETILIN, Dr. Mari Alkatiri hatete, iha tenpu besik Aviaun ne’ebe TL iha,sei halo operasaun ba Municipiu Maliana, Suai no Postu Administrativu Atauro.

“Aviaun atu hahu ona atu ba Maliana atu ba Suai atu ba Atauro semana ida ne’e,” dehan Kamarada Mari Alkatiri iha debate espesialidade OJE 2016 bainhira Deputadu Jorge Teme kestiona konaba Aviaun ne’ebe TL agora iha.

Tanba ne’e, Kamarada Mari dehan, Aviaun ne’e laos ba Oekuse deit, maibé sei ba Municipiu Manufahi maibé sei ba halo inspeksaun ba pista Aviaun Manufahi, sei halo inspeksaun ba Pista Vikeke no Lauten nian, para hahu halo operasaun ba Municipiu sira ne’e hotu.

Municipiu Baukau, Kamarada Mari dehan, persija rehablita pista ne’e hodi nune’e Aviaun bele halo operasaun.

Kamarada Mari dehan, nia ba Oekuse atu halo dezenvolvimentu hodi hadia povu nia moris.

“Hau la ba Oekuse para atu halo povu Oekuse sai vitima, hau ba Oekuse para ajuda hadia povu Oekuse nia vida,” dehan Kamarada Mari.

Knar ne’ebe Kamarada Mari simu nudar misaun foun tanba kumpri konstituisaun RDTL, atu kaer Oekuse para atu sai zona especial ida no regiaun administrative especial, Kamarada Mari dehan,  laos nia mak husu.

“Se koalia povu Oekuse, hau mos kuñese diak povu Oekuse I hau servisu ho povu hau lao tama uma sai uma para halo dialogu ho povu ho familia tomak,” dehan Kamarada Mari.