Bainhiara mak Implementa Desentralizasaun?

Bainhira los mak implementa Dezentralizasaun? Pergunta ne’e ofrese husi deputadu Bankada FRETILIN Kamarada Antoninho Bianco iha debate espesialidade orsamentu Jerál estadu 2016 (16/12/2015).

Iha parte seluk, Kamarada Bianco mos husu konaba estutu suku ne’e ba oin, halo nusa? Serake iha hanoin ruma iha futuru, suku sira  bele jere rasik osan ruma atu halo dezenvolvimentu iha suku laran.

Tuir Kamarada Bianco katak, organisaun suku ne’e hari kleur tiha ona, maibe agora buat hothotu mai husi nivel nasional.

Hatan ba kestaun ne’e, Ministru Estadu Kordenador Asuntu Administrasaun Estadu no Justisa Dr. Deonisio Babo hatete, prosesu reforma administrativa lao hela, agora  perparasaun kuadru legal no perparasoens teknika.

Iha prosesu ne’e, Babo dehan,  fahe ba parte rua, primeiru tinan ida ne’e Konselhu Ministru finalize estutu administrasaun municipal nian no tama ba prosesu dezkonsentrasaun.

“Fin 2016 sei halo avalisaun geral hodi hare kondisaun minimu konaba implementasaun prosesu dezkonsentrasaun, depois mak dezentraliza maibe prosesu hotu sei lao faziadamente,” dehan Babo.

Gestaun ba orsamentu iha Suku, Babo dehan, durante ne’e implementa liu husi programa PNDS .

“Sira (suku) aprezenta planu no programa mai nasional hodi deskute hare no aprova maibe sira kontrola projetu sira ne’e no la involve direita,” dehan Babo

Orsamentu tinan 2016 aloka ba Ministru Estadu Kordenador Asuntu Administrasaun Estadu no Justisa, hamutuk $664 fahe ba kategoria salariu vensimentu $142 mill, kategoria bens servisu $507 mill, kategoria kapitál menor $15 mill.

Entertantu Orsamentu ba  Ministru Estadu Kordenador Asuntu Administrasaun Estadu no Justisa pasa ho votu afavor 62, Konra Zero no Apstensaun Zero.