PN Aprova OJE 2016, FRETILIN Husu Implementa Tuir Lei no Hametin Kordenasaun

Parlamentu Nasionál aprova iha final global orsamentu jerál estadu 2016 ho totál Billaun $1. 562 233 ho votu afavór 64 kontra zero no apstensaun zero.

Bankada Fretilin liu husi Kamarada Antoninho Bianco iha deklarasaun hatete, tinan ida ne’e nudar tinan dala 13 wainhira sura husi restaurasaun 20 Maio 2012.

Durante restaurasaun independensia Timor Leste gasta ona osan billoens $8 resin, esfórsu sira ne’ebé halo gestaun oi-oin hanesan kriasaun  fundu petrolifeiru atu bele asegura estadu no povu Timor Leste nia moris.

Esfórsu hirak ne’e halo  ho objetivu prinsipál ida deit, hanesan kauza komun ne’ebé Timor oan hotu asumi responsablidade mak atu halakon kiak no mukit.

Ba tinan 2016 kontinua aloka osan atu halo dezenvolvimentu hodi hametin establidade, paz no dezenvolviementu atu nune’e bele hatutan nafatin prosesu dezenvolvimentu hodi valorize  nia heroi sira ne’ebé fó sira nia vida ba luta libertasaun Nasionál.

Prosesu ba oin ne’e, Kamarada Bianco dehan, Orgaun soberania sira hotu hahu husi Prezidenti Republika, Parlamentu Nasionál, Governu no Tribunal asumi nia papel hodi halo dezenvolvimentu ba rai no povu Timor Leste.

Fretilin hanesan opozisaun kontinua fó hanoin ba governu atu governante ida- idak tenki define liña politika ida klaru, hametin liña kordenasaun ida ne’ebé diak hodi hametin planu dezenvolvimentu integradu, hafórsa instisaun estadu no valoriza sira nia servisu.

Ba governante sira tenki ukun tuir lei no regras ne’ebé vigora, aplika sansaun ba ema sira ne’e kontra ukun no regra ne’ebé vigora iha Timor Leste.

Tribunais sira tenki halo justisa tuir konstituisaun no lei haruka, PNTL ho F-FDTL tenki servisu hamutuk hodi garante siguransa no deféza ba povu TL.

Husu entidade hotu no povu Timor Leste laran tomak atu tau matan ba servisudores estadu, atu nue’e servisu hotu tuir regras ne’ebé iha.

Aluta Kontinua para Vitoria do Povu!!!!!!!!!!!!!!