INTERVENCAO INICIAL
BANCADA PARLAMENTAR FRETILIN
Obrigado e muito Bom
dia Sr. Presidente Parlamento Nacional e Caros Colegas Deputados,
Sr. Primeiro Ministro
ho nia elenco governativa, Bemvindo iha Parlamento Nacional,
Ecxelencias,
Ohin, iha uma fukun
Parlamento Nasional ida ne’e, ita hahuu’u dadaun ona debate generalidade OGE
2016 nian. Ne’e debate ba dala hat OGE nian iha ambiente no postura politika
ida n’ebe partidos políticos ho asentu parlamentar ho nia bancadas
parlamentares, oposição ka bancadas partido governo nian, buka intende malu no
servisu hamutuk atu resolve problemas nacionais no kontribui ba desenvolvimento nacional.
Nuene’e, debate
orsamentu 2016 ne’e importante tebes no sai hanesan oportunidade ida atu ita
hotu tau hanoin hamutuk hodi hare no buka solusaun ba problemas nacionais, no oin
sa ultrapassa desafius sira konaba economia Timor-Leste.
Excelencias,
Governo prepara OGE
2016 iha momento ne’ebe conjuntura mundial ida ho presu minarai kada barril tun
maka’as no afeta ba economia paizes iha mundo, enkuantu despesas estado
tinan-tinan kuaze totalmente depende ba resitas hosi minarai ka Fundo
Petrolifero.
Situasaun ida ne’e
duni maka obriga Governo Timor-Leste halo rasionalizasaun ba estado nia
despesas, maibe rasionalizasaun laiha significado tanba tun uitoan ka kuaze
mantein tetu orsamental 2015. Governo
tenta duni atu hatun ba $ 1.3 biliaun, maibe no final hasae fila fali tanba
kompromisu atu halo investimento barak liu tan iha áreas chaves hanesan
infraestruturas no Desenvolvimento Capital Humano.
Biar aumenta tan iha
despazas capital nian, maibe se Governo consistente no aplika ho rigor politika
eficiência no eficácia iha preparasaun plano no orçamento, governo sei bele
hamenus osan barak hosi despezas rekorentes particularmente iha bens e serviços
ne’ebe durante ne’e hamosu desperdisius ka gasta narnaran deit no benefisiu ka
aproveitamentu laiha ka uitoan deit. Nune’e reforsa liu tan política poupança,
ke no fim bele halo tetu orçamental tun liu tan.
Hanesan Exemplo ida,
deslocações ka viagem ba estrangeiro iha institusoes estado hotu atu atende
covites ka capacitação servidores estado nian, maibe ho delegação ka numero bot. Ne’e, too ona
tempu atu defini politika ida mais adekuadu no reduz despesas significativamente.
Ita nia diretores, membros do Governo, deputados no servidores estado sira
seluk, halo viagem ba rai liur mak barak liu do que servi estado iha rai laran,
enkuanto Povo iha rai laran iha áreas remotas no áreas izoladu, la dun senti
presença estado nian iha sira nia hela fatin atu hetan informasaun no orientasaun
oinsa atu hadia sira nia moris.
Tinan-tinan, ita nia
orçamento ba despesas rekorente excluindo FDCH no transferências ba ZEESM, bot
liu mais de dobro hosi despesas de capital. Situasaun ida ne’e hatudu katak ita
konsume barak liu do que investe atu hetan retorno económico no social. Ne’e
sai desafio bot ba Governo, atu oinsa maka halo equilibro entre despesas oin
rua ne’e, ka oinsa inverte situasaun ida ne’e katak despesa capital mak sei bot
liu despesa recorrente.
Excelencias,
Teto orsamental tinan
ne’e laiha diferença significante kompara ho tetu orsamentu tinan hira ba
kotuk, no nia tendensia atu aumenta ka sae, bot liu tan to’o 2020, tuir governo nia previzaun rasik. Nune’e
mos défice fiscal nao petrolífera (isto ee reseitas domesticas menus despesas)
kontinua bot nafatin, ke halo ita se la recorre ba imprestimo, dalan ikus tenke
recorre ba RSE no levantamento excessivos hosi fundo minarai, ke no fim dependência
ba fundo minarai bot nafatin.
Maibe fontes rekursu
ba finansiamentu despesas estado ida ne’e hatudu situasaun ida contrario ka oin
seluk tebes. Folin mina tun maka’as no laiha serteza atu recupera, ke afeta
tetebes RSE. Reseitas minarai hosi kampu Bayu Undan hahu tun ona drasticamente
no to’o 2022 ita sei hetan osan mais de $1 biliao deit. Posu foun iha área JPDA
no área exclusiva seidauk descobre.
Maske iha estudu
balun hatudu katak iha ona posu lubuk ida, maibe seidauk hatene bainhira maka
halo esplorasaun. Posu balu ne’ebe hetan ona, seidauk halo perfurasaun tanba kompania mina
ladun iha interesse atu investe tanaba kustu bot no mina nia folin tun.
Investimento fundo minarai iha mercado financeira mos iha risku maka’as no iha
2015 ne’e lakon osan lubun ida.
Campo greater Sunrise
mak projeto ida kontinua la iha serteza, tanba ita nia capacidade negociação la
suficiente no sei iha aspeto legais no política lubuk ida mak tenke considera,
aumenta tan ho problema fronteiras marítima nian halo situasaun incerteza liu
tan. La hatene bainhira maka ita bele dada pipeline mai ita nia rai, maibe
Projeto bot Tasi Mane avansa dok liu
tiha ona.
Imprestimo hanesan
fonte rekursu ida ba financiamento
despesas ba infraestruturas basicas, maibe hamosu tusan ka divida neebe maske
nian funan kiik liu, futuramente tenke selu. Tinan-tinan divida publika aumenta
ba bebebeik. Tuir plano governo nian, to’o 2020 Timor-Leste sei halo dividas
publicas hamutuk $ 1,113,4 milhoes. Politika dividas ita opta tanba dividas
ne’e konsesional ho taxa de jurus kiik liu, maibe to’o tinan 2020 taxa de jurus
aumenta ho capital ne’ebe ita deve, sai bot liu ona. Governo seidauk iha plano
ne’ebe forte no sustentável katak investimento hosi divida ne’e, hetan retornu, no hosi retornu selu fali dividas
ne’e, laos selu fali hosi fundo minarai. Atu nune’e ita la tau fundu minarai
iha risku ne’ebe a’as liu tan.
Receitas domesticas
mos la hatudu situasaun nebe diak liu iha
tinan ida ne’e no iha futuru. Reseitas
domesticas kiik tetebes kompara ho reseitas petrolíferas no continua kiik.
Tinan-tinan sae ka iha duni aumento, maibe sae neneik tebes no aumentu ne’e
entre $1 ate 2 milhoens de dólares deit. Ho politika reforma iha gestão
económica no financeira ne’ebe governo introduz dadaun ne’e, Governo preve ona
katak komesa 2017 to’o 2020 sei iha aumento kada tinan entre 9 ate 10 milhoes
de dólares. Biar nune’e, to’o 2020 total reseitas domesticas seidauk bele kobre
despezas rekorentes, ate salarious e vencimentos dei mos seidauk bele taka
hotu. To’o ohin loron faktus hatudu ona katak tinan-tinan reseitas domesticas
nunca atingi saída mak previsto iha OGE. Situasaun hanesan ne’e obriga ita recorre
ba RSE no leventamento excessivo hosi fundo minarai, ka halo imprestimo.
Situasaun konaba
fontes rekurusu ba financiamento hirak ne’e hatudu katak fundo minarai iha
medio prazo hasoru risco ne’ebe a’as tebes. Situasaun ida ne’e mos obriga ita tenke hanoin ona oinsa assegura
sustentabilidade orsamental iha medio no longo prazo liu-liu 2022 ba oin.
Sr. Presidente,
Sr. PM,
Caros colegas
deputados,
Governo mos consiente
no preocupa ho situasaun hirak ne’e. Ne’e duni maka halo Governo trasa política
ka estratégia de antecipação da despesas (frontloading), no introduz dadaun ona
reforma balu iha nível gestão económica e financeira hanesan: reforma judicial
no harmonização legislativa; reforma iha Administracao Publica; Reforma
Economica; no reforma fiscal, reforma gestão do desempenho no reforma
desempenho orçamental.
Ho estratégia de
antecipação da despesas, governo sei halo levantamento excessivos hosi fundo
minarai hodi investe iha projetos de alta qualidade hanesan infraestruturas no
desenvolvimento de capital humano ne’ebe mak sei lori efeitos duradouro iha
economia. Governo fiar katak investimento hirak ne’e maka sei estimula
crecimento económico no gera resceitas fiscais barak liu tan no hamenus despesa
publica iha longo prazo, ke no fim permite elimina gradualmente levantamento
excessivos.
Estrategia ne’e diak,
maibe ita bele iha esperanca bainhira halo investimento ida ho prudência no equilibrado
iha área chaves, laos deit infraestrutura no educação, maibe tenke investe mos
iha agricultura no saude, no investimento hirak ne’e lori duni retorno
económico no social maka’as, no wainhira investimento privado barak liu ona
investimento publico.
To’o agora,
Investimento publico barak ona maka ita halo, maibe problema mak oin sa nia
retorno ne’ebe ita hotu hein. Governo rasik seidauk iha mecanismo ida forte atu
maximiza retorno por kada dólar gasto. Hanesan exemplo, seitor eletricidade nia
reseitas nudar retorno económico sei uitoan tebes compara ho investimento
ne’ebe halo tiha ona, nem bele taka despesas de manutensaun no fornesimentu
combustível.
Osan barbarak mak
Tinan-tinan aloka ona ba seitor
infraestrutura basicas maibe seidauk hatudu resultado ne’ebe mak diak no
maximu. Projetos barak mak nia kusto exagerado compara ho volume projeto liu-liu
iha projetos plurianuais, tanba ne’e mak resultado uitoan deit, a’at lalais
tanba laiha qualidade, nune’e osan barak habokur deit kompania ho nia mafia
sira. Situasaun ne’e kontinua maske governo hamosu tiha ona ADN atu halo
avaliasaun no monitoriza implementasaun kada projeto. Hatudu katak ita seidauk
iha sistema kontrolu ida forte atu assegura kualidade projeto. Ita hein katak reforma hirak ne’ebe governo
halao ne’e bele mos fo solução ba problema hirak neé hodi garante sucesso ba
governo nia política de antecipação da despeza.
Problema seluk iha
área infraestrutura ne’ebe considera seriu, maka sistema manutensaun ne’ebe
inklui mos manutensaun ba património estado
hanesan kareta no sst. Ne’e laos deit tanba problema gestão, maibe mos
tanba recursos humanos. Hanesan exemplo, Dala barak ita hare estrada hetan koak
ka a’at iha parte balu, la hadia kedas maibe hein to’o estrada ne’e a’at total
ona maka halo fali estrada foun. Se la
sala, iha OGE 2016 la tau osan ba manutenção rutina ba estradas no pontes.
Karik ita hein tinan tolu hat mai wainhira estrada no pontes a’at total ona
maka ita atu halo fila fali foun.
Iha área Educacao
nudar seitor chave ba desevovimento capital humano, ita mos halo ona
investimento barak maibe kiik liu kompara ho investimento iha área
infraestrutura. Ita nia politika
edukasaun gratuita halo labaraik barak liu iha Timor-leste maka hetan asesu ba
prosesu aprendizagem, maibe barak mos seidauk hetan facilidades adekuadu ba
aprendizagem, hanesan material didaktica, karteira, biblioteca no falta
frofesores kualifikadu. Hare ba taxa partisipasaun labarik sira iha eskola
tinan-tinan aumenta, maibe atu hetan kualidade edukasaun ne’ebe diak , sei dok
tebes hosi ita hotu nia expectativa. Politika konaba língua de ensino mos sai
faktor determinante ba kualidade edukasaun iha Timor-Leste.
Tanba ne’e , além de
hadia política konaba língua de ensino, ita tenke investe barak i barak liu
tan, hanesan paiz sub desenvolvimento sira seluk ne’ebe investe barak iha
seitor educação por exemplo Indonesia aloka osan 20 % hosi OGE ba edukasaun,
Nepal 21%. Maibe, Timor-Leste nia
investimento iha edukasaun tinan-tinan varia ho media 9 % deit, enkuantu
situasaun edukasaun Timor-Leste nian pior liu rai hotu iha sudeste Asia.
OGE 2016 nian la
refeleta política de antecipação da despesa ne’ebe atu investe barak iha
desenvolvimento capital humano hanesan mos seitor edukasaun, tanba orçamento ba
educação representa 8 % deit. Ho investimento kiik hanesan ne’e difisil tebes
atu ita hadia kualidade educação ida ne’ebe diak, ke no fim determina kualidade
capital humano no garante ba trabalhadores qualificados atu compete iha mercado
de trabalho Nacional ka ASEAN.
Seitor Agricultura la
tama hanesan seitor ida ne’ebe atu hetan investimento iha política de
antecipação da despeza hosi Governo. Maibe seitor ida ne’e potencial tebes atu
hamosu posto de trabalho, no loke oportunidade ba diversificação economia
através de substitucao de importações ho exportações iha mercado regional
ne’ebe diak. Realidade hatudu katak maioria povu moris iha área rural no sira
moris ho agricultura. Nune’e investimento iha agricultura bele tulun povu
maioria hodi kore sira husi kiak no
garante segurança alimentar, no hamenus mal-nutrisaun iha ita nia rain.
Governo investe barak
ona iha seitor ida ne’e, hodi hadia infraestruturas, fahe fini, fahe trator no
equipamentos oioin, fila rai gratuita no programa sst, maibe nia desempenho iha
economia nao-petrolifera uitoan los. Ita sei importa fos hosi rai liur atu
assegura segurança alimentar. Biar nune’e, nudar seitor ne’ebe importante no estratégico atu hadia economia Nacional ita precisa investe barak liu tan.
Relativamente ba
reformas ne’ebe Governo introduz tiha ona, ita hein katak reforma sira ne’e
hadia eficiência no eficácia iha despeza publica tuir objetivos ne’ebe Governo
defini ona.
Sr. Presidente
Parlamento Nacional,
Sr. Primeiro
Ministro,
Povo Timor-Leste
tomak
Ida Ne’e maka anlisa no
reflesaun critica hosi Bancada FRETILIN, nudar bancada oposição, ba OGE 2016
nian, hanesan contribuição ida atu assegura sustentabilidade orsamental iha madio
longo prazo, hametin base economia no hametin estado Timor-leste. Ita hotu sei
hamutuk nafatin hasoru desafiu sira ohin nian no iha oin mai, no lori
Timor-Leste ba dalan los desenvolvimento no moris diak ba povu tomak. HAMUTUK ITA BELE!
Obrigado!!!
Tidak ada komentar:
Posting Komentar