UNISMA-Activista Pro-RDTL Apoio FRETILIN ba Segunda Luta Libertasaun Povu Maubere

Grupo UNISMA-Activista Pro RDTL (Eis Grupo CPD-RDTL) mai husi Distrito Viqueque, Lautem, Baucau, no Manatuto ne’ebe lidera husi Koordenador Jeral UNISMA Adelino dos Santos “Hadomi” no Francisco Naimana, ho nia estrutura tomak Região Leste no Sul kuaze hamutuk 120 hato’o sira nia deklarasaun katak tempu to’o ona atu hamutuk fila fali FRETILIN hodi lori povu ne’e ba moris diak, tanba FRETILIN mak libertador ho prinsipio sentido estado ne’ebe hatudu ona iha tempu funu no iha tempu ukun-an.

UNISMA-Activista Pro-RDTL deklara sira nia pozição bainhira halo inkontru ida ho Deputadu Bankada FRETILIN ne’ebe lidera husi Kamarada Fransisco Miranda Branco, Kamarada Joaquim do Santos Boraluli, Kamarada Manuel de Castro Pereira no estrutura FRETILIN Sub Distrito Venilale, Distrito Baucau (23/01/2016).

Iha reuniaun ne’e mos Cordenador Jeral UNISMA deklara katak durante tinan 13 ukun-an ne’e UNISMA-Activista Pro RDTL observa katak povu maubere sidauk kaer rasik nia kuda talin tanba ne’e iha segunda faze da libertaçãon do povu, ne’ebe atu liberta lolos povu ne’e so FRETILIN. Ho reuniaun ne’e UNISMA – Aktivista Pro – RDTL liu husi nia lideransa hato’o rekomendasaun kona ba lei divizaun teritorial, lei Xefe do Suco no Municipio katak antes aprova presiza deskute klean hodi nune’e bele refleta ba ita nia independesia ida ne’e.

Hatan ba deklarasaun ne’e kamarada Deputado Joaquim dos Santos “Boraluli” hatete katak, atu itinji objektivu kaer rasik kuda tali tenke tama iha fileira de regra do estado tanba ita nia estado ejiste ona hanesan estado soberano iha sudeste Asiatico. Atu liberta povu presiza hamutuk iha fileira ida ho sentido do estado hodi nune’e ita bele liberta ita nia povu.

Iha fatin hanesan kamarada Deputado Francisco M. Branco ható katak libertasaun povu ne’e exercicio ida ba ita tomak hodi servisu makas ba tinan 2017  lori fila fali FRETILIN kaer ukun. Ho ida ne’e atu apelu ba kamarada sira UNISMA-Activista Pro – RDTL katak hamutuk hodi lao tuir palavra de ordem FRETILIN nian katak prática é a critéria da verdade.