Komisaun E iha PN Bolu ADN

Komisaun E ne’ebé trata asuntu infraestrutura transporte no telekomonikasaun iha Parlamentu Nasionál, bolu Azensia Dezenvolvimentu Nasionál (ADN) hodi klarifika konaba projetu sira ne’ebé implementa iha rai laran.

ADN obrigatoriu tenki hasoru Komisaun E Parlamentu Nasionál tanba, projetu sira halo tinan hat too lima ona ohin loron seidauk remata tanba falta kontrolu husi ADN rasik.

Membru Komisaun E, Deputadu Manuel Castro hatete, komisaun E Ejizé atu ADN interga dokumentu hotu konaba projetu hirak mak hotu no hirak mak seidauk hotu.

“Ami husu sira (ADN) atu fornese dokumentus, lista projetu hothotu, liliu projetu sira ne’ebé mak hotu ona, ida ne’ebé mak selu ona ida ne’ebé mak seidauk selu, hanesan projetu patrimoniu komonitariu, estrada, edefisiu no MGs, projetu sira hotu ne’ebé mak iha ADN nia supervizaun,” dehan Castro iha PN (27/01/2017).

Konaba Projetu eleitrisidade iha suku balun too ohin loron seidauk realize, Castro haktuir katak, ADN mos lamenta, projetu sira ne’e la realize tanba iha grupu sira iha baze mak hadau malu.

“Iha problema barak tanba bainhira sira (ADN) too iha ne’eba, atu dada dehan ita nia vetaranu sira hadau malu, sai kestaun mos ba sira (AND),” dehan Castro.

Entertantu konaba Projetu emerzensia 2013 nian ne’ebé mak akontese balun ADN labele rekomenda atu selu tanba too iha fatin projetu maibe projetu la realize.

Komisaun E Parlamentu Nasionál sujere atu governu bele selu projetu sira ne’e tuir rekomendasaun ne’ebé mai husi inkeretu parlamentar aprezenta ona.

Konaba kualidade Estrada, Komisaun E parlamentu Nasionál mos kestiona no ADN rekuñese katak balun iha kualidade no balun laiha kualidade maibe ADN promete katak sira sei esforsu nafatin atu halo kontrolu ne’ebé diak hodi bele garante nia kualidade.