Hamutuk ho FRETILIN Luta ba Libertasaun Povu!

Bankada Fretilin iha Parlamentu Nasionál kontinua halo kontaktu ho nia militantes sira iha bazé hodi rona perokupasaun povu iha bazé inklui fahe mos informasaun politíka iha rai laran ne’ebé liga ho dezenvolvimentu politíka no sociál.

Iha loron 16 fulan Janeiru deputadu Bankada Fretilin liu husi  Kamarada deputadu Leonel Marcal, Kamarada Manuel Gaspar no Kamarada Fransisco de Andrade halo kontaktu eleitorál iha Suku Debos, Sub-distritu Suai, Distritu Covalima.

Iha intervensaun, Kamarada Deputadu Leonel Marcal hatete, importante agora iha Fretilin mak tenki hamutuk hodi nune’e Fretilin metin no forte nafatin.

‘Hamutuk ita forte fahe malu ita fraku!, se ita fahe malu ita fó espasu ba ema atu mai ho liafuan falsu hodi bosok no sobu ita,” dehan Kamarada Leo Marcal.

Kamarada Leo Marcal dehan, agora dadauk problema barak iha rai laran hanesan Estrada, Bemos no nesesidade baziku seluk seidauk rejolve tanba  ne’e povu tomak tenki hamutuk fali ho Fretilin hanesan iha tenpu rezistensia hodi luta nafatin ba libertasaun do povu.

Kamarada Leo  Marcal dehan, lalika fo fatin ba partidu sira ne’ebé laiha bazé, laiha planu no programa, laiha futuru atu fahe ema Fretilin.

Iha fatin hanesan, Kamarada Manuel Gaspar, husu povu tenki hamutuk nafatin ho  Fretilin atu luta ba libertasaun do povu.

 “A Vitoria perparace, a Vitoria organizace!, ita atu manan buat ida tenki perpara an didiak, ita atu manan buat ida ita tenki organiza an didiak, “dehan kamarada Gaspar.

Kamarada Gaspar dehan, uluk ema Fretilin perpara an, organiza an para manan funu, no funu manan ona, agora Fretilin perpara an, organiza an para bele kaer governu hodi bele  liberta povu.

‘Aluta kontinua! Para liberta povu husi kiak no mukit husi susar oi-oin,” dehan Kamarada Manuel Gaspar.

Tanba ne’e, Kamarada Manuel Gaspar husu atu povu TL fo fiar nafatin ba Fretilin atu bele realize komprimisiu libertasaun do povu se fó ba partidu seluk, rikusoin TL mohu hotu mos seidauk bele liberta povu, tanba bainhira sira kaer tau interese sira nian barak liu duke interese povu no nasaun nian.

Iha parte seluk, Kamarada Deputadu Fransisco de Andrade husu ba militantes no simpatizantes sira atu matan moris neon nain ba issu politíka sira ne’ebé mosu iha rai laran.

Maske Timor Leste opta sistema demokratiku multipartidarismu, maibé Kamarada Fransisco de Andrade dehan, partidu barak mosu tuir nia tenpu deit, tanba ne’e  labele monu tuir promesa falsa sira ne’e.

“Partidu balun moris hanesan musin man, tenpu eleisaun mak mosu mai maibé kuandu nia lakon nia prezidenti fali nia sekretariu jeral mos lakon, kuandu eleisaun besik ona sira komesa mosu fali na ho promesa falsu sira,” dehan Kamarada Andrade.

Bainhira besik eleisaun iha partidu foun barak mosu, maibé ho ema oin tuan sira ne’ebé periodu iha partidu ida, peridu ida haksoit fali ba partidu seluk, periodu seluk hari partidu foun maibé sira mak ne’e nafatin.

“Lalika fiartan partidu sira hanesan ne’e, kuandu eleisaun besik sira lori osan $5 dollar ka 20 mai sosa imi, se imi simu siginifika imi sosa ona imi nia terus durante tinan 5,tanba depois sira hetan tiha kadeira sira nunka besik imi,” dehan Kamarada Andrade.

Vice Kordenador Politíka Fretilin Distritu Kovalima Kamarada Alexandrino da Cruz hatete,  Fretilin sei luta nafatin ba dezenvolvimentu Timor Leste nian atu nune’e povu bele moris diak, povu bele moris iha naroman, povu labele halerik tan ba Be no povu labele halerik tan ba Estrada.

Maibé, buat sira ne’e akontese bainhira Povu Timor Leste tomak liliu Suku Debos  hamutuk nafatin ho Fretilin hodi bele atinji objetivu ne’e.

Iha fatin hanesan Vice Kordenador Sub-distritu Suai Vila Kamarada Agostino da Silva  hatete,  Fretilin partidu ida hamutuk ho natureza.

Prezensa Deputadu Bankada Fretilin atu haforsa nafatin Fretilin hodi perpara an nafatin hasoru dezafiu no aktividade politíka sira ne’ebé sei akontese iha tinan 2017.

Fretilin laos ohin mak moris, Fretilin moris atu liberta povu husi kolonialista no fasista nia ukun hodi buka ukun rasik an.

‘Fretilin mak ukun an, se laiha Fretilin ukun mos laiha,” dehan Vice Kordenador Sub-distritu Suai Kamarada Agostino.

Tanba ne’e, Kamarada Agostino husu atu militantes no simpatizantes sira atu kaermentin nafatin prinsipiu Fretilin nian hodi luta ba libertasaun do Povu.

“Fretilin mak luta ba ukun an, ukun an hetan tiha ona, agora Fretilin luta nafatin ba liberta povu husi kiak no mukit,” dehan Kamarada Agostino.

Entertantu  Kontaktu eleitorál hanesan halo mos  husi  Kamarada Fransisco Branco ho Kamarada Angelica da Costa  iha Aldeia Karbulau, Suku Hola Rua, Sub-distritu Same, Distritu Manufahi.

Iha kapital Dili, Kontaktu eleitorál halo iha  Sub-Distrito Nain Feto kompostu husi Suku Bidau Lecidere, Aikadiru Hun no Grisinfor ne’ebé Realiza iha Sucu Bidau Lecidere (16/01/16) ho " Tema " Liu Husi Kontaktu Eleitorál  Hametin Unidade no Konfiansa ba Partido FRETILIN iha Estrutura no Militante iha bazé.

Iha parte seluk, Kamarada Manuel Castro ho Kamarada Ana Ribeiro halo mos Kontaktu eleitorál iha  Municipiu Baukau, Postu Administrativu Kelikai.

Iha Distritu Vikeke, Kontaktu Eleitorál halo iha Sub-distritu Ossu,  Lidera husi Kamarada Joaquim do Santos Boraluli no Kamarada Deputada Anastasia Amaral  hodi rona perokupasaun komonidade sira nia iha fatin ne’eba.