Dezafiu Boot iha 2016, Kamarada Mari Alkatiri: “Ita Sobele Hasoru Bainhira Ita Hamutuk’

Sekretariu Jerál Partidu Frente Revolusionariu Timor Leste Independente (FRETILIN), Kamarada Dr. Mari Alkatiri hatete, 2016 FRETILIN sei infrenta dezafiu boot tanba ne'e persija hamutuk hodi hasoru. 

“Hau hakarak hatete deit ba maluk sira hotu, ba kamarada sira hotu katak perpara an ba, 2016 dezafiu ida que boot tebes ita atu hasoru, 2016 ita sei marka prozisaun ida, dala ida tan atu afirma buat ida que sagradu! Bainhira povu nia vida tau iha kauza, ita sobele hasoru dezafiu ida ne’e bainhira ita hamutuk,” dehan Kamarada Mari Alkatiri bainhira halo refleksaun ida ho Deputadu Bankada FRETILIN (08/01/2016).

Iha kontekstu harii estadu no halo dezenvolvimentu, Kamarada Mari dehan, ema balun hare nia hanesan diabu maibé nia prontu sai diabu tanba hakarak halo buat diak ba rai TL.

“Hau hatene katak hau moris atu sai diabu, ema balun moris para atu sai Santo, hau asumi ona hau nia funsaun atu sai diabu, mais diabu ida que ulun to’os tebtebes, saida mak loos (ne’e) loos saida mak sala (ne’e) sala,”  dehan Kamarada Mari.

Kamarada Mari dehan, agora nia buka atu rejolve problema ne’ebé mak povu infrenta laos estatutu (kadeira).

 “Pozisaun ba deputadu mak 65, pozisaun ba governu bele muda, pozisaun atu sai Primeiru Ministru mak ema hotuhotu hakarak, hau lakohi ona, hau hakarak afirma kedas klaramente iha ne’e, hau lakohi ona, tanba hau hanoin tenpu ona atu bele ajuda rejolve problema nasionais, tenpu ona atu labele buka deit kadeira,” dehan Kamarada Mari .

Tuir Kamarada Mari Alkatiri katak, atu liberta povu no rejolve problema povu nian mak FRETILIN nia prinsipiu.

“Hau hakarak hatete momos, lalika laran taridu, lalika perokupa hau la buka estatutu, hau buka atu rejolve problema povu nian, ne’emak Fretilin hakarak, ne’emak ita hotu hakarak,” dehan Kamarada Mari.