Sentidu Estado mak Hanesan Fuan ba Libertasaun Povu

Iha loron 24 Janeiro 2016 Kamarada Deputada Angélica da Costa no Joaquim dos Santos “Boraluli” hamutuk ho  Vice Cordenador CPD-Manufahi kamarada Antónino Sarmento halo kontaktu eleitoral iha Sub Distrito Same, Distrito Manufahi.

Kamarada Deputada Angélica da Costa hateten povu tenki nafatin ho FRETILIN hodi servisu makas ba moris diak, dezafiu barak mak FRETILIN sei hasoru, propagandas politíka oin-oin ne’ebé ema sei halo hasoru FRETILIN maibé tenki hametin lutu FRETILIN nian hodi nune’e povu nafatin ho FRETILIN iha fileira ida hodi luta ba libertasaun do povu.

Iha fatin hanesan Kamarada Deputado Joaquim dos Santos “Boraluli” hateten katak kontaktu eleitorál hanesan programa Bancada FRETILIN nian hodi mai rona eleitoradu sira nia preokupasaun kona ba nesesidades bazikú ne’ebé mak povu iha bazé hasoru, no fahe informasaun ba eleitoradu sira.

Tanba FRETILIN iha PN preokupa makás ba nia povu maubere ne’ebé mak uluk hamutuk FRETILIN luta ba rai ida ne’e to’o ukun-an.

 Ohin loron ema preokupa katak laiha ona opozisaun iha PN, ne’e hanesan argumentu falacia katak nia hatene hela maibé fó fali argumento ne’ebé mak lalos, tanba opozisaun laos ho kritika deit maibé opozisaun tenke kritika ho konstrutivu katak buat ne’ebé mak los ne’e los no buat ne’ebé mak salah ne’e salah, hodi nune’e ita bele lori nasaun ne’e ba oin.

FRETILIN nudar partido libertador iha nia responsabilidade ba nia povu no rai ida ne’e, tanba ne’e mak FRETILIN sempre lao tama Suko no Aldeia iha teritorio Timor laran tomak hodi rona povu maubere nia preokupasaun.

FRETILIN lori naroman mai Timor Leste hodi fó naroman ba nia povu hodi lao tuir nia dalan ne’ebé mak FRETILIN hatudu katak disiplina ho sentidu estado mak hanesan fuan ba libertasaun povu, tanba pátria FRETILIN liberta ona, atu atinji libertasaun povu tenke halo exercicio ne’ebé mak bo’ot liu husi FRETILIN hodi povu maubere kaer rasik nia kuda tali para liberta-an.

Iha oportunidade ne’e povu iha Sub Distrito same preokupa kona ba esbosu lei eleisaun ba xefe do Suku no lei divizaun teritoriál husi Governo liu husi Ministério Administrasaun Estatál e Ordenamento Teritorial (MAEOT) ne’ebé mak konsidera suco hanesan Associação, kestaun ne’e povu ható tanba estado tenke iha nia estrutura ida ne’ebé mak forte wainhira iha legitimidade husi nia povu rasik hodi nune’e bele solidu para halao dezenvolvimento ba rai ida ne’e. Ho ida ne’e husu PN halo deskute klean antes halo aprovasaun ba lei ida ne’e.